حلقة النهارده من بودكاست “النفسانجي” بتناقش موضوع بيهم كل أب وأم وهو: إزاي نوعي أولياء الأمور بأهمية الرياضة في حياة أولادهم؟ كتير من الأهالي بيشوفوا الرياضة كأنها نشاط ترفيهي أو شيء ثانوي، لكن الحقيقة إنها عنصر أساسي في النمو النفسي والجسدي للطفل، وبتلعب دور مهم في تكوين شخصيته وتعزيز ثقته بنفسه.
الرياضة مش بس حركة، دي كمان انضباط، التزام، وتفريغ للطاقة بشكل إيجابي. في ظل انتشار الموبايلات والألعاب الإلكترونية، الأطفال بيقضوا وقت أطول قدام الشاشات، وده بيأثر على صحتهم النفسية والجسدية. هنا بييجي دور الأهل في تشجيع أطفالهم على ممارسة الرياضة من غير ما تكون بديل عقابي أو حاجة مفروضة عليهم.
ضيفنا في حلقة النهارده هو الكابتن عبدالله شحاتة، مدرس دكتور بقسم النظريات والتدريبات والجمباز والتعبير الحركي بكلية علوم الرياضة بجامعة بني سويف، واللي هيقدم لنا رؤية علمية وعملية حول تأثير الرياضة على الأطفال، وطرق فعالة لتشجيعهم على ممارستها بدون ما يحسوا بالملل أو الضغط.
هنجاوب خلال الحلقة على أسئلة مهمة زي: ليه الرياضة مهمة أصلًا للأطفال؟ إزاي نخلّي أولادنا يحبوا الرياضة بدل ما يهربوا منها؟ وإزاي نساعدهم يلاقوا متعة في الحركة بدل الإدمان على الشاشات؟ لو بتدور على تربية صحية ومتوازنة لأولادك، الحلقة دي ليك.
